الحمدلله في الصيف اكتشفنا اكشن زون .. مع ان دوم نمر عليه ، بس و لا مره فكرنا نسيرله -كله على بالنا حق العيال الكبار مع ان العكس صحيح- .. مكان وايد حلو .. و واسع .. و متروس العاب .. متنوعه .. و ما في زحمه .. و فيه مسيد .. و مطعم .. و كل وسايل الراحه .. و اسعاره مناسبه
بس عندي بعض الملاحظات عليه -مافي شي كامل و الكمال لوجه الله-
- كم مره سرنالهم و العاملات هناك بعدهن يخمن بالمكينه الكهربائيه مع انه يوم ويكند و المفروض يكونون مستعدين من اليوم الي قبل ، انا كل الي احاتيه واير الكهرباء .. و مره وحده تخم و ياره البلك وراها .. وين السيفتي
- مكينة التصوير الفوتوغرافي مال هيلو كيتي -و الي كل مره بسامي تبا تصور فيها- مخلص حبرها ، و كل ما نخبر الريال المسؤول يقول لا ها من انعكاس الشمس الصور تطلع مب واضحه -على منو ها الكلام؟-
- في لعبة صيد سمج ، المفروض الياهل يصيد و في النهايه يحصل سمجة قولدفيش جائزة .. لعبة وايد حلوه بس مافي سمجة
- المطعم شوي غالي ، بس يأدي الغرض اذا ناويين تيلسون وايد
- يا ريت لو كان في سكيوريتي على الباب .. صحيح ما يحتاي اذا الاهل موجودين .. بس من باب الاطمأنان
- و لا تنسون تمرون ستار بكس او المحطه تيبون معاكم كوفي حقكم -انتو الكبار- .. تتسلون و انتو تراقبون الصغاريه
الاثنين، 19 نوفمبر 2007
Action Zone أكشن زون / بوظبي
الأحد، 18 نوفمبر 2007
سخرية بعض الاطفال من بعض
للأسف بعض الاحيان الصغاريه يكونون قاسيين على بعض –نحن كبار و نفهم ان هاي حركات يهال و خصوصا الاولاد يحبون يحبون يغلسون على بعض- .. بس خلودي فديته حساس و ما يفهم ليش ها الاولاد يتصرفون معاه بها الشكل
بعد ما وداه ابوه اول يوم ياني زعلااااااااااااااااان و ما صدق سألته شو فيك ، و انفجر من الصياح .. يقول “الاولاد يتضحكون علي” .. اقوله ليش و يقولي ما ادري .. طبعا سألته ابوه –و بما انه ريال اكيد قالي “عادي اولاد يلعبون”- .. بس انا شليت هم خالد و كيف يقدر يتصرف في مثل ها المواقف ، اذا حد سخر منه او قعد يضحك عليه بدون سبب مقنع .. و سويت بحوث في كتب التربيه عندي و في النت .. و طلعت بها النقاط الي بلخصلكم اياها ان شاء الله
اذا تعرض ابنك/بنتك للسخريه كيف تتصرف
كأم/أب شو اسوي ؟
- التحدث عن المشكلة ، او حث الطفل على الحديث عما يضايقه .. و جعله يحس انك تشاركونه همومه .
- جمع معلومات ، من الطفل طبعا .. شو صار بالضبط؟ .. هل انت تعرضت لها الشي من قبل؟ .. هل هو نفس الشخص او المجموعه الي دايما تسخر منك ؟ .. ليش يسخر منك ؟ .. كيف رديت عليهم ؟ .. نفع وياهم و الا لا؟ .. تتمنى تكون تصرفت بشكل ثاني؟
- حسس طفلك انك تقدر مشاعره ، بس بدون مبالغه من طرفكم في التصرف او ردة الفعل .. بعض الدراسات العلمية اكتشفت ان مخ الطفل يتصرف و يستجيب للألم النفسي الي يتعرضله الطفل نتيجة سخرية او رفض من أصدقاءه هو نفس الألم الي يحسه اذا تعرض للأم جسدي .. عشان جي لازم ما نستهين بها السالفه
- مساعدة الطفل التمييز بين نوعي المزح او السخرية .. حاولوا تساعدون اطفالكم التمييز بين مزح الاصدقاء و بين المزح الي الهدف منه ايذاء مشاعرهم .. طبعا هذا ما بيصير الا اذا استثمرتوا الكثير من الوقت في محادثة العيال .. دايما ، دايما كلموهم –يا ناس-
- فهموا عيالكم ليش الاطفال يسخرون من بعض .. الاسباب متعدده بس فهمومهم على حسب سنهم .. نقولهم ان ها اليهال يسوون جذي للمزح او الضحك .. للفت الانتباه .. او يمكن لان ها متضايق فيحاول يحط حرته في حد ثاني .. بعض الاطفال يقولون نحن نمزح لعب بس في داخلهم يمكن يضمرون العكس .. بعض الاطفال يجارون اصدقاؤهم .. يعني اذا واحد في المجموعه سخر من حد ، ربعه يزيدون معاه بدون اي سبب ، بس لان صديقهم سوا ها الشي –يعني بدون اقتناع-
استراتيجيات يستخدمها الطفل لمواجهة السخرية:
- السؤال .. خلي طفلك يواجه الي يسخر منه و يسأله “ليش انت تقول عني جي؟”
- ارسال رسالة “انا اريد” قوية .. يعني بعد خلي طفلك يواجه الي يسخر منه باسلوب “انا اريدك تتركني في حالي” .. او “اريدك توقف ها الشي” .. و باسلوب حازم ، و الهدف من ها الشي ان طفلك يبين في صورة القوة الغير مهزوزة .
- اعتبار كلمة السخرية ككلمة ثناء او مديح .. مواجهة الشخص الساخر كالتالي “شكرا على مديحك” .. او “شكرا لملاحظتك”
- اسلوب التجاهل
- اسلوب الاستغراب من السخريه .. “صدق ؟ .. ما كنت ادري ان فيني ها الشي .. شكرا”
- الصراحه في التعبير عن عدم الموافقه على السخريه .. “انا ما يعجبني انك تسخر مني ، لو سمحت وقف” .. “انت تضايقني ، خلاص وقف عن ها الشي”
اشياء كثيره حاولت احصرها في ها النقاط .. قد يعتقد البعض اني مبالغه في تصرفي .. بس الطفل لازم يتأسس من صغر لمواجهة المستقبل بحلوه و مره .. يمكن هاي مواقف بسيطه بس تصرف الاهل فيها يحط حجر أساس كبير داخل الطفل –اوني بديت اتفلسف- .. ياللا الله يقدرنا ان شاء الله على تربية عيالنا
الجمعة، 16 نوفمبر 2007
لتطوير مهارات الطفل في استخدام الكمبيوتر
مافي اسرع من الطفل في تعلم استخدام الكمبيوتر ، يمكن لانه يدرك انه عالم كبير بامكانه اكتشاف وايد اشياء من خلاله .. أول موقع خالد اشتغل عليه كان pbskid.org -كان عمره سنتين و نص- موقع حلو و جذاب و تعليمي بالدرجة الاولى و يعتني بمهارات الطفل المختلفه ، و فوق هذا آمن .. و ما صادفنا معاه اي مشكله في استخدام الكمبيوتر -كل طفل و له قدراته- .. لكن لما كملت بسامي ثلاث و نص افتكترنا ان لحد الحين ما عطينها الفرصه انها تستخدم الجهاز .. و اول ما بدينا معاها بصراحه ما كانت مثل اخوها -اعتقد هذاك بالفطره عرف يمسك الماوس و يحركه- هاي خذت وقت طويل يلين ما تعلمت تمسك الماوس و كيف تستعمله .. و كان في لعبه معينه في ها الموقع هي الي ساعدتها -وايد مب شوي- و اعتقد ممكن تساعد اي طفل .. و بفضل الله صارت وايد متمرسه الحمدلله -شو نسوي نساير تطور العصر-.
تفضلوا رابط اللعبة
الخميس، 15 نوفمبر 2007
الـ crocs أحذية قبيحة .. مريحة .. خطيرة
لو لاحظتوا قبل فترة طلعت موضة الكروكس ، او -تكرمون- النعول المطاطية الي كأنها صنادل .. بالنسبة لي اشوفها جدا قبيحة ، بس وااااااااااااااااااااااااايد مريحه .. و بسرعه الياهل يحطها في ريله -يعني بعد تريح الام- .. و الوانها جذابه ، و عيالي استانسوا على سالفة الدبابيس الي يقدرون يعلقونها عليها -في دبابيس مخصصه لها- .
و على الضجة الي سوتها ها النعله اول ما ظهرت .. الحين في ضجة ثانيه على خطورتها بعد عدة حوادث صارت لاطفال لابسينها و ماشين على السلالم المتحركه .. يوم قريت الخبر في موقع Fox News ما استوعبت كيف ممكن ها الحوادث تصير ، بس عقب ما شفت الصور فهمت .. لو تنتبهون للسلم المتحرك ، في بدايته و نهايته شي مثل المشط و هذا هو الي ممكن يتعلق في فتحات النعال و يأذي اللابس -خصوصا الاطفال لان ريولهم صغيره-
بس انا ما البس عيالي ها النعله حق المولات عشان جي ما بتخلص منهم .. جدا مريحه .. و اعترف ان انا ودي البس شراتهم -بس فضيحه- و خاطري احط عليه دبابيس مثلهم -الله يسامحهم ما يخلوني اختارلهم
و هاي صور من الخبر
شجعي طفلك على حفظ القرآن .. استخدمي عنقود العنب
كأم حريصه على تحفيظ عيالي القرآن الكريم ، دايما احاول ادور طرق او اساليب مساعده او تشجيعيه للطفل للحفظ .. و عنقود العنب احد الوسائل التشجيعيه الي لقيتها على النت و عجبتني و استانس خالد عليها .. طبعت العنقود و علقته في حجرته و كل ما يحفظ سورة لون حبة العنب مالتها .. و اختار اللون البنفسجي لعنقوده ، و للعلم بعدنا ما خلصنا -ان شاء الله قريب ادعولنا- .. ودي اسوي واحد حق بسامي بس احس بعدها صغيره
العنقود الي لقيته كان يخص جزء عم ، بس اعتقد نقدر نغيره يعني اذا نبا حق جزء تبارك بس نغير البيانات .. و هكذا بالنسبة لباقي أجزاء القرآن الكريم
الأربعاء، 14 نوفمبر 2007
كم ساعة نوم كافية لطفلك ؟!
كلنا نعرف فوائد النوم للطفل و كيف يساهم بنمو خلايا المخ .. الحمدلله بسامي تاخذ كفايتها ، بس احس خالد لا ، لانه ما يرقد الظهر و في الليل ما يرقد بسرعه .. و انا اتصفح النت بها الخصوص ، اكتشفت انه في مؤسسة نوم وطنيه في امريكاNational Sleep Foundation -استغربت شوي بس ان دل على شيء فإنه يدل على اهمية النوم-.
المهم .. في موقعهم كان حساب الساعات الكافيه لكل طفل كالتالي:
* شاملة ساعات النوم خلال النهار
الثلاثاء، 13 نوفمبر 2007
دورات مركز المواهب والإبداع نوفمبر 2007
مركز المواهب و الابداع التابع لهيئة الثقافة و التراث في ابوظبي .. يعرض الدورات التاليه ، مع ان تاريخ التسجيل فات بس يمكن في مجال للي يحب .. كنت بسجل خالد لو في شي يناسبه ، بس بصراحه ما شي .. و بسامي بعدها صغيره بالنسبه لهم
-الرســم
- الخط العربي
- الموسيقى ” أورغ “
- الموسيقى ” بيانو “
- الباليــة
- اللغةالأنجليزية “مبتدئة”
- اللغة الفرنسية”مبتدئة”
- اللغة الفرنسية “متقدمة
التسجيل يبدأ من 21 – 31 /10 / 2007م.
شروط التسجيل:
للمشتركين من مواليد شهر نوفمبر 2001م نوفمبر 1989م.
صورة عن جواز السفر.
يغلق باب التسجيل عند اكتمال العدد.
الفئة العمرية وفق طبيعة كل دورة.
لا يرد رسم الاشتراك بعد التسجيل.
المركز غير مسئول عن المشتركين بعد انتهاء وقت الدوام.
للأستفسار: هاتف: 6195257/02 - 6195319/02 - 6195268/02