نشيدة “أطفالنا” من ألبوم أحمد بوخاطر الجديد

السلام عليكم

شرينا شريط بوخاطر اليديد “حسنات” .. طبعا انا آخذ للأشرطه للعيال مب حقي .. و سمعنا الشريط ، و الاناشيد كانت عاديه -و الحانها كلها هنديه- الشي الي ما عيبني وايد .. لكن من يت نشيدة “أطفالنا” تخبلوا الصغاريه .. النشيدة فعلا وااااااااااااااااااااااااااااااااااايد حلوه .. و أحلى نشيدة في الشريط .. الي محلي النشيدة انه مستخدم اهازيج شعبيه مع كلمات النشيده ، عشان جي صايره روعه .. و عيالي جالبين الكلمات .. ل “حمامه نودي نودي .. سلمي على خلودي” .. فديتم

أنصحكم تشترون الشريط بس

مشروع لاعب كرة قدم !!

خالد أظهر اهتمام كبير بكرة القدم من سن صغيره وايد .. عشان جي اول ما سمعنا عن نادي ياخذ يهال ابتداء من 3 سنوات ، ما صدقنا و على طول سجلناه .. كان عمره 4 سنوات ، و ها النادي كان في Fort Worth, Texas .. ما شاء الله تقدرون تشوفون ابداعه في الفيديو المرفق ، اللاعب بوفانيله رقم 9



و بعد ما وصلنا الامارات دورناله نادي يكمل فيه مشواره الكوروي ، ماااااااااااااااااااااااااااا لقينا .. معظم النوادي المحليه تاخذ اليهال الكبار شوي .. من 9 سنوات و طالع .. لكن العام الماضي لقينا في جريدة الوسيط اعلان عن نادي كرة قدم اسمه Football For All و ما صدقنا .. على طول سجلناه ، و الحمدلله لعب معاهم طول السنه .. و ان شاء الله بيلعب هاي السنه بعد .. يلعبون في مدينة زايد الرياضية و مقسمين الاولاد على حسب العمر ، و المدربين نوعا ما زينين .. بس نادر ما تلقى طفل مواطن مسجل في النادي ، معظمهم اجانب عرب و جنسيات اخرى .. طبعا ما اعترض على ها الشي .. الحمدلله كلنا واحد و ها نادي خاص و اي حد ممكن يسجل فيه .. بس كم يسوى يوم تشوف عيال البلاد يستخدمون النشاطات المتوفره حق عيالهم .. و الي يضايق شوي انك تروح ها المكان و انت مواطن و تحس انك غريب في ارضك .. و رسوم الاشتراك شوي غاليه

حلو الواحد يحط عياله في نشاط او رياضة بعد المدرسه .. يا ريت و اتمنى ان عيال البلاد يستغلون حاجة الاهل مثلي لمثل ها النوادي لعيالهم الصغار و يسوولهم نادي خاص مثل ها النادي و نحن على طول بنسجل عيالنا عندهم

يا رب توفق خالد

مركز هامل الغيث لتحفيظ القرآن الكري

من سكنا بوظبي في صيف 2006 و انا اشوف لوحة مركز هامل الغيث للتحفيظ الخضراء على شارع المطار ، و لما قررت أسجل خالد لدورة تحفيظ كان المركز اول خيار جدامي .. و الحمدلله توفقت ، لاني اكتشفت ان عندهم دوره صباحيه للأطفال من 3-5 سنوات فكان ها احسن مكان اسجل فيه بسامي بما انها قاعده في البيت -لا شغله و لا مشغله- .. المبلغ كان رمزي و ساعات دوامهم الصباحيه مناسبه .. بس بسامي داوت اسبوعين بس -مسألة المواصلات صعبت علينا- في ها الاسبوعين حفظت ما شاء الله كمن سورة ، و نطقها للحروف وااااااااااااااااااااايد تحسن .. و خالد داوم عندهم في الفترة المسائية ثلاث مرات في الاسبوع -و ما كمل الدوره لظروف خارجه عن ارادتنا-

طبعا المركز مقسم بحيث يكون الطابق الارضي للبنات و العلوي للأولاد .. و فيه مدخل جانبي للرجال ، و حديقه صغيره جدام المركز .. كلشي حلو و منظم قد ما يقدرون .. بس المشكله في ان البوابه مفتوحه ، و فيه خوف ان الياهل يطلع

هذا الصيف سجلت خالد مره ثانيه حق الدوره الصيفيه ، و ها المره داوم عندهم كل الايام الا آخر اسبوعين -عشان السفر- .. ما شاء الله تبارك الله حفظ عندهم من سورة الزلزلة لسورة الفجر .. بصراحه .. بصراحه كان جهدي اكبر من جهدهم ، لاني انا احفظه في البيت و في المركز الاستاذ يراجعله و يصلحله .. و عنده سجل صغير ، الاستاذ يقيمه بشكل يومي و يحط ملاحظاته

باذن الله ناوين نسجل خالد للدوره اليايه ، بعد رمضان .. و اتمنى من كل قلبي انهم ياخذون بسامي معاه -لانهم ما ياخذون الي اقل من 5 سنوات حق الدوره المسائية- بس بنحاول ان شاء الله

جزا الله الي بنا المركز و كل الي يشتغلون فيه كل خير ان شاء الله